ROXAS CITY – Ginapanindugan sang barangay kagawad sang Barangay Olutayan, sining syudad nga indi mga mananagat sang ila lugar ang nagpangsaka kag nagpangkuha sang kagamitan sang isa ka sakayan pangisda gikan sa Barangay Culasi nga magapadulong kuntani sa Masbate.
Ginpahayag ni Kagawad Josephine Martinez nga wala sang alyas bulag nga mananagat nga residente sang Barangay Olutayan.
Suno sa opisyal nga tanan nga sakayan sa ila lugar ang naka-rehistro kag wala sang may nagagamit sang dinamita.
Indi man desperado ang mananagat sang Barangay Olutayan para magpangsaka kag magpangkuha sang kagamitan sang iban nga sakayan nga nagaagi sa ila kadagatan.
Pananglitan man nga may madakpan ang bantay dagat kag mga PCG personnel nga nagapatigayon sang iligal nga pangisda nagaagi ini sa proseso.
Aminado si Martinez nga wala sang kaugalingon nga service boat ang PCG personnel nga na-assign sa Barangay Olutayan sa diin kun may yara sila nga pagadakpon ginagamit ang pumpboat sang kagawad nga chairman sang Committee on Fisheries.
Samtang ginpahayag ni Martinez nga wala pa ginabuksan ang ila isla sa mga turista nga luyag magpatigayon sang excursion sa diin may yara sang nagabantay ukon naga-roving nga kagawad sa puting balas kada Sabado kag Domingo nga adlaw kag ginapahanumdum ang magadungka nga indi residente sang Barangay Olutayan nga wala pa sila nagabaton sang maga-excursion.
Sa karon gina-estoryahan sang konseho sang Barangay Olutayan ang pagahimoon nga tikang agud maamligan ang pangalan sang ila barangay.
Matandaan nga ginkakibot sang mga residente sang Barangay Olutayan ang naglapta nga report nga may grupo sang mangingisda nga nagsaka sa isa ka sakayan pangisda gikan sa Barangay Culasi nga magapadulong kuntani sa Masbate kag ginpangkuha ang ila kagamitan sa kalalawran sang Olutayan.
