Nakabalhag sang pito (7) ka insidente sang pagpangawat sang motorsiklo ang kapulisan sa syudad sang Roxas sa sini nga tuig 2025.
Sa interview sang Bombo Radyo kay PCMS. Ramil Arcangeles, Tigpamaba sang Roxas City Police Station, suno sa iya duha ang nabalhag sa bulan sang Enero; Pebrero-1; Marso-1 kag tatlo naman sa karon nga bulan sang Hunyo.
Dugang pa ni Arcangeles, nga natigayon naman nga masolbar sang kapulisan ang apat ka motor kag natigayon man nga madakpan ang amo nagpangawat magluwas lamang sa tatlo ka kinawatay nga nagluntad sang nagligad nga semana.
Matandaan nga sang Hunyo 15, isa ka Suzuki Smash ang nataban sa Hemingway Street, Suzuki Raider naman ang ginkawat sa Barangay Milibili sang Hunyo 18 kag isa ka unit sang Suzuki Burgman naman ang nataban sang kawatan sa Sitio Sto. Niño, Barangay Baybay sang Hunyo 19.
Apisar sang sunod-sunod nga pagkadula sang motorsiklo, nagapati ang kapulisan nga nagnubo ang numero sang kinawatay kun ikumparar sang nakaligad nga tuig.
Sa karon, padayon pa sa gihapon ang imbestigasyon sang mga kapulisan angut sa mga motor nga nagkaladula agud nga marecover.