PANITAN CAPIZ – Madasig nga ginkuha kag ginsakay sa traysikol sang wala pa makilan-an nga mga persona, ang isa ka kanding nga nakahigot sa Barangay Cadio banwa sang Panitan.
Sa interview sang Bombo Radyo sa Punong Barangay sang lugar nga si Lenny Degoma, ginpahayag sini nga personal nga nagpadulong sa ila barangay si Johhny Daylo tag-iya sang kanding agud ipabalhag nga nabiktima ini sang kawatan.
Suno kay PB Degoma nga base sa pahayag ni Daylo nga samtang nakahigot ang iya hinuptanan nakit-an niya sini nga ginakuha kag ginakarga na sa traysikol sang wala pa makilan-an nga mga persona.
Dugang pa ni Daylo nga iya pa ini nga ginsita apang madasig ini nga nagpalagyo padulong sa banwa nga direksyon.
Mahibaluan nga indi lamang ini ang una nga tion nga may nagluntad nga pagkinawatay sa ila lugar kung sa diin sa karun maid-id ini nga ginatutukan sang mga opisyales agud matumod na kag mauntat ang kasubong sini nga insidente.
Panugyan sang Punong Barangay sa iya mga nasakupan nga mangin aligmat kag kung mahimo hugot nga bantayan ang mga kasapatan kag mas maayo nga gilayon nga ipahibalo sa ila agud mahatagan sang aksyon.
