ROXAS CITY – Nagdangat sa 12, 949 nga mga miyembro sang Pantawid Pamilyang Pilipino Program (4Ps) ang ginpangkakas bangud sa intensified cleansing sang Department of Social Welfare and Development (DSWD) sa bug-os nga Western Visayas.
Ini ang ginkumpirmar ni Atty. May Rago Castillo, Public Information Officer sang DSWD Region VI, sang mainterview sang Bombo Radyo.
Ang nasambit nga datos ang para lamang sa bulan sang Hunyo kag lauman nga magataas pa ang numero bangud sa ginpasangkad nga cleansing sa listahan sang mga benepisaryo sa mando ni President Ferdinand “Bongbong” Marcos Jr.
Mahibaluan nga yara sa 300,000 ang kabug-usan nga benepisaryo sang 4P’s sa bug-os nga Western Visayas.
Kalakip sa mga ginpangkakas ang mga unqualified kag ineligible nga mga benepisaryo, nakalab-ot na sa level of suffiency ukon makasarang na magsagod sa pamilya kag nakagradwar na ang mga kabataan kag may trabaho na.
Samtang, ginahulat pa sang natungdan nga ahensya ang implementing guidelines gikan sa nasyunal para sa mga panibag-o nga mga benepisaryo sang nasambit nga programa.
Suno kay Castillo, ang mga kwalipikado nga benepisaryo ang pagakuhaon mismo sa ila nga database kag ginasiguro sini nga deserving ang makasulod kag matuod nga nakahinaglan sang bulig.
