IVISAN, CAPIZ – Ginbuy-an na sang mga otoridad sa kalalawran nga sakop sang banwa sang Ivisan ang isa ka green sea turtle ukon pawikan nga nakit-an sang pila ka mga residente sa Barangay Balaring, sa nasambit man nga banwa.
Suno kay Punong Barangay Wilson Umiten, nakit-an sang pila ka pumuluyo ang nasambit nga pawikan nga nabulamburan sang lambat rason nga ila ini nga ginkuha kag gindala sa higad sang baybayon.
Ginpahayag sini nga wala sang nakit-an nga pilas sa lawas sang lalaki nga pawikan nga ginabulubanta nagabug-at sang 80 tubtob 100 ka kilo.
Suno naman kay Ivisan Mayor Felipe Neri Yap, dako ang ila pagpasalamat sa mga pumuluyo kag opisyales sang amo nga lugar bangud gilayon sila nagapakig-angut sa mga otoridad sa tagsa ka may makit-an nga mga endangered animals kapareho sang pawikan.
Suno diri nga gilayon nga ginpadulungan sang Municipal Environment and Natural Resources Office (MENRO) sang amo nga banwa ang nasambit nga pawikan agud butangan sang tanda antes ini buhian sa kadagatan.
