ROXAS CITY – Ginkumpirma sang Jail warden sang Bureau of Jail Management and Penology – Roxas City Jail- male dormitory nga indi shabu ang na-recover nga isa ka plastic sachet nga gintambakan sa kahoy sang mahogany.
Ginpahayag ni Jail Senior Inspector Dever Fantilaga nga ba-se sa resulta sang examinasyon sa regional crime laboratory nga tawas ang unod sang nakita nga plastic sachet sang damlag lang sa guwa sang facilidad.
Wala man ginadula ni Fantilaga ang posibilidad nga nahulog lamang ini bangud alagyan ang ila lugar ukon mahimo nga ginsaskuhan lamang sila bangud istrikto ang iya pamunuan sa pagpatuman sang pagsulundan sa Roxas City Jail – male dormitory.
Matapos nabaton ang resulta sang examinasyon sa nakita nga plastic sachet, gilayon nga naghimo sang progress report si Fantilaga kag ginsumiter sa regional office sang BJMP.
Bangud sa insedente mas ginhugot pa gid ang pagpatuman sang seguridad sa nasambit nga facilidad.
Nahibaluan nga ginapahanugutan sa gihapon ang lima ka minutos nga pagtawag sang mga Persons Deprived of Liberty (PDLs) sa ila mga himata, sa diin sa ini nga pamaagi mabulong ang kahidlaw sa ila pamilya nga indi pa makabisita sa ila bangud sa COVID-19 pandemic.
Samtang ginkumpirma ni Fantilaga nga may 14 ka mga preso nga gikan sa Roxas City PNP ang ginturn-over sa ila sa BJMP, apang gindala pa nila sa karon sa Panay Isolation facility sa Pototan, Iloilo kag magatenir sila didto sa sulod sang 21 diyas.
