ROXAS CITY – Mas madamo ikumparar sang nagligad nga tuig, ang nakuha nga mga bulawan nga medalya sang delegasyon sang Capiz sa nagtakop nga Western Visayas Regional Athletic Association (WVRAA) meet 2024 nga ginpatigayon sa probinsya sang Negros Occidental.
Sa interview sang Bombo Radyo kay Mr. Ronie Reteracion DepEd Capiz-Sports Coordinator, ginpahayag sini nga talalungpadan ang iban nga probinsya kung sa diin madamo nga mga bulawan nga medalya ang ila napauli bangud suno diri nga ginatutukan ang ila mga atleta kag may yara sila sang mga ginpang-imbita nga trainer nga magasanay sa ila delegasyon.
Mahibaluan nga nakakuha sang 10 ka gold medals, 19 silver medals kag 17 brone medals ang elementary level, 13 gold medals, 22 silver medals, kag 50 brone medals sa secondary level, 2 gold medals, 5 silver medals kag 13 bronze medals sa paragames kag 4 gold medals kag 3 silver medals sa demonstration sports.
Suno kay Reteracion, bangud madamo nga mga atleta ang naggraduate nagasugod naman sila liwat sa paghanas sa mga bag-o agud makompleto ang iban nga mga event nga wala napasakupan subong nga WVRAA 2024.
Sa pagtakop sang WVRAA meet 2024, nakuha sang probinsya sang Iloilo ang kampeonato kag 2nd runner up ang Aklan sa elementary level, sa secondary level kampeon sa gihapon ang Iloilo, 1st runner up ang Negros Occidental kag Aklan bilang 2nd runner up, sa paragames Iloilo ang kampeon, 1st runner up ang Negros Occidental kag 2nd runner up ang Aklan, kag sa demonstration sport kampeon sa gihapon ang Iloilo, 1st runner up ang Capiz kag 2nd runner up ang Aklan.
