Palamangkutanon sa karon kun paano nakalusot ang binulto nga marijuana dried leaves sa hugot kag tuman ka strikto nga seguridad sa mga bagahe sa mga ticketing outlet kag pantalan.
Sa interview sang Bombo Radyo kay alyas Ruth, clerk sang isa ka ticketing outlet, ginsaysay sini nga sa pagpadala sang mga bagahe, ginapangayo sang mga ini ang mismo nga pangalan sang nagapadala kag ginapadal-an, ginapangayuan man ang mga ini sang contact number sang nagapadala kag sa magakuha, kag kinahanglan man nga magpakita sang Valid ID agud mapatuod nga ini ang tag-iya sang bagahe nga iya ginapadala.
Dugang pa ni Ruth, naga-contact man ang mga ini sa mga konduktor sang Roro bus bangud kinahanglan man nila nga makuha ang mga detalye sang mga bagahe nga igapadala sa ila outlet. Wala man sila basta lang nga nagabaton sang padala kun indi kumpleto ang detalye sang nagapadala kag ginapadal-an.
Nagapabilin man nga palamangkutanon sa ila kun ngaman nakalusot ang binulto nga nakumpiskar nga marijuana dried leaves bangud sa kada pantalan nga pagaagyan sang bus, hugot ang ginapatuman nga seguridad sang management.
Matandaan nga nakumpiskar sang mga otoridad ang ginabulubanta nga masobra 1 milyon nga balor sang marijuana dried leaves sa Barangay Ilawod banwa sang Panitan.
Sa inisyal nga impormasyon nga nakuha sang Bombo Radyo sa lugar, karga sang isa ka RoRo nga may plaka 8825 nagikan sa Alabang ang amo nga bag kag ginapahayag nga ginbilin sa RoRo Outlet.
Sandig sa nangin panaysayon sang tag-iya sang outlet nga si alyas “Rusty”, ginpahayag sini nga nagduda ini bangud wala sang nakasulat nga pangalan kag address sa bag rason nga nagpakig-angut ini sa Panitan PNP agud ipalab-ot ang impormasyon.
Sang ginbuksan na sang mga ini ang amo nga bag, ginkakibot na lamang sang mga otoridad sang nadiskobrehan ang binulto nga marijuana nga nakaputos sa 15 tanan ka mga dalagko nga plastic wrapper.
Panugyan ni Ruth sa mga ticketing outlet, siguraduhon nga kuhaon ang detalye sang nagapadala agud masiguro nga safe ang mga ini kag indi na maliwat ang kasubong nga sitwasyon nga natabo sa isa ka ticketing outlet sa banwa sang Panitan.
