ROXAS CITY – Nagaguwa sa imbestigasyon sang Roxas City Fire Station nga bangud sa napabay-an nga kandila nga nakatungtong sa plastic durabox ang gintunaan sang pagkasunog sang isa ka balay sa Sitio Luyo, Barangay Culasi, Roxas City.
Ini ang ginkumpirmar ni SFO2 Reynold Agda, Chief – Arson Investigation and Intelligence Unit sang BFP-Roxas City sang ma-interview sang Bombo Radyo.
Matandaan nga totally burned gid ang puluy-an nga ginapanag-iyahan ni Marlene Moleño nga residente sang nasambit nga lugar.
Suno diri, antes nagtulog ang bana ni Marlene, nagsindi ini sang kandila sa babaw sang plastic nga durabox nga malapit sa iya sikwayan.
Ginpahayag nga wala napatay sang bana ang amu nga kandila kag nabatyagan na lamang sini nga nagaainit na ang iya tiilan kag didto nakita nga nagakasunog na ang ila puluy-an.
Madasig naman ini nga nagpangayo sang bulig sa iya mga kaingod nga balay kag gilayon ang mga ini nga nagpanawag sang bombero. Nahibaluan nga wala sang kuryente ang nasambit nga balay rason nga kandila ang ila ginagamit.
Bangud human sa light materials ang puluy-an, madasig ini nga gintupok sang kalayo.
Maswerte naman nga wala na naglapta pa sa kaiping nga mga pamalay ang sunog bangud ginrespondehan ini gilayon sang katapo sang bombero subong man sa pagbinuligay sang mga residente nga matapna ang sunog. Naglab-ot naman sa P18,000 ang nangin kahalitan sang amu nga sunog.
Sa karon, nagapadayon ang imbestigasyon sang Bureao of Fire Protection angut sa nasambit nga sunog.
