ROXAS CITY – Ginklaro ni Punong Barangay Martin Antonio Pimentel sang Barangay 1, Roxas City nga wala pa nag-guwa ang resulta sang real-time polymerase chain reaction (RT-PCR) test sang isa ka COVID-19 suspect nga napatay sa ila lugar.
Ginpahayag sini nga matuod nga nag-guwa sa datos sang gobyerno sang siyudad nga may nag-positibo sa COVID-19 nga napatay sa Luna Novicio Street, apang taga-Barangay 2 ini kag indi sang taga-Barangay 1.
Ginklaro man sini nga ang napatay nga suspect case sa Barangay 1 ang naga-edad sang 79 anyos samtang ang napatay nga confirmed case sa Barangay 2 ang naga-edad sang 70 anyos.
Gindugang pa ni Pimentel nga ang napatay nga suspect case nga taga-Barangay 1 ang ginlubong kag wala gin-cremate.
Ginkompirmar naman ni Punong Barangay Luzminda Dela Cruz sang Barangay 2 nga ila gidman nga residente ang napatay nga suspect case nga nag-positibo sa COVID-19.
Ini ang naga-edad sang 70 anyos nga babaye, napatay sadtong Setyembre 3 kag gilayon nga gin-cremate.
Gin-aku man ni Dela Cruz nga ulihi na siya nakahibalo nga nag-positibo sa COVID-19 ang suspect case sa ila barangay bangud wala siya gilayon na-impormar natuhoy diri.
Mahibaluan nga ang Luna Novicio Street ang sakop sang duha ka mga barangay nga amo ang Barangay 1 kag 2.
