Ginlubong na sa Heritage Memorial Park sa Taguig City sang Huwebes ang napatay nga Police Senior Master Sergeant Diane Marie Mollenido kag ang iya walo ka tuig nga bata nga si John Ysmael suno sa National Capital Region Police Office (NCRPO).
Antes ang ila lubong sa memorial park, ginpahayag ni NCRPO spokesperson Police Major Hazel Asilo nga may ginhiwat nga memorial Mass sa St. Joseph Parish sa sulod sang Camp Bagong Diwa.
Si Mollenido nagtrabaho sa Regional Personnel and Record Management Section sang NCRPO.
Matandaan nga sang Enero 24, nasapwan ang bangkay ni Mollenido sa higad sang Pulilan Bypass Road sa Barangay Dulong Malabon, Pulilan, Bulacan nga may pilas sa ulo.
Pagligad sang lima ka adlaw, sang Enero 29, ang bangkay ni Ysmael nasapwan sa isa ka plantasyon sang kalamansi sa higad sang dalan halin sa uma pakadto sa merkado sa Barangay Maluid, Victoria, Tarlac.
Napatay ang duha matapos naglain ang transaksyon sa pagbaligya sang salakyan sa Quezon City sang Enero 16 suno sa kapulisan.
Ginpasaka ang reklamo para sa duha ka kaso nga robbery with homicide kag theft sa Prosecutor’s Office sang Quezon City batuk sa tatlo ka mga suspetsado nga ginalakipan sang car agent, iya partner, kag isa ka kaupod.
Isa pa ka babaye nga suspek nga utod sang asawa sang car agent ang nagsungka sa mga otoridad sang damlag lang kag natalana nga irefer sa Prosecutor’s Office para sa inquest proceedings.
