Nagbuya na sa iya nga puwesto si National Police Commission (NAPOLCOM) commissioner Edilberto Leonardo matapos nga ini ang ma-cite in contempt sang House Quad Committee bangud sa pagbinutig.
Ginkumpirma ni NAPOLCOM vice chairperson Alberto Bernardo sa atubang sang mga mamalidha ang pagbuya ni Leonardo.
Wala naman ginsambit sini kun magapangatubang bala sa administrative case si Leonardo.
Dugang pa sini nga iya istoryahon ang pila ka mga commissioners kag ila ipahibalo sa Office of the President pinaagi sa tiglikom sang Department of Interior and Local Government (DILG) kun sila ba ang magahiwat sang administrative investigation.
Matandaan nga ginmanduan sang Quad Committee nga mapreso sa Batasang Pambansa Complex sa Quezon si Leonardo matapos nga ginpanginwala sini ang pakikighinun-anon bag-o ang pagpatay sa tatlo ka Chinese drug convicts sa Davao Prison kag Penal Farm sadtong Agosto 2016.
Ang nasambit nga paghinun-anon ang natabo sa Davao City Criminal Investigation and Detection Group Office nga gintambungan sadto ni Davao Prison and Penal Farm Chief Gerardo Padilla kag retired police colonel Royina Garma apang nagpakatig-a si Leonardo kag ginpahayag nga wala sang natabu nga anuman nga paghinun-anon.
