Ginmandu sang National Police Commission (NAPOLCOM) ang pagpahalin sa serbisyo sang 11 ka pulis nga ginatudlo nga may kaangtanan sa kaso sang mga nadula nga mga sabungeros kag mga ginaalegar pagkidnap sang tuig 2021.
Sa isa ka pahayag, nakita sang NAPOLCOM nga may administratibo nga sala ang mga pulis nga halin sa Regional Drug Enforcement Unit sang National Capital Region Police Office (RDEU-NCRPO).
Ginkasuhan sila sang 2 counts sang grave misconduct kag 2 counts sang conduct unbecoming of a police officer.
Ang mga ginpamatud-an nga may sala amu sanday Police Lieutenant Colonel Ryan Jay E. Orapa, Police Major Mark Phillip S. Almedilla, Police Senior Master Sergeant Mark Anthony A. Manrique, Police Staff Sergeant Edmon H. Muñoz, Police Staff Sergeant Robert Allan E. Raz Jr., Police Staff Sergeant Denar S. Roda, Police Corporal Alric M. Natividad, Police Corporal Reynaldo G. Seno Jr., Police Corporal Ronald John V. Lanaria, Patrolman Rufino Miguel D. Panghulan, kag Patrolman Develyn M. Tapalla.
Base sa NAPOLCOM, naghalin ang kaso sa mga reklamo nga ginpasaka sanday Milagros Estacio kag Elizabeth Sotto sang Setyembre 3, 2025.
Gintudlo sini ang mga pulis nga responsable sa pagkidnap sang ila mga bata sa separado nga anti-drug operations sang 2021.
Sa press briefing, ginpahayag man sang mga complainant ang posible nga koneksyon sang ila mga kaso sa pagkadula sang pila ka sabungeros, nga nagresulta sa mas madalom nga imbestigasyon sang komisyon.
Sa rekord, gina-alegar nga ginkidnap si Dane Mark Carlos sang Pebrero 17, 2021 sa Maynila, samtang si Charles Dean Sotto naman ginkidnap sang Marso 24, 2021 sa Las Piñas City.
Ginpahayag sang NAPOLCOM nga ini nga mga tikang amu ang seryoso nga paglapas sa ila Memorandum Circular No. 2016-002, nga nagaklasipikar sang kidnapping bilang grave misconduct kag conduct unbecoming of a police officer.
