ROXAS CITY – Matigdas nga ginpahayag ni Atty. Joseph Celis, Regional Director sang National Police Commission (NAPOLCOM) nga madugay na sini ginsiling pag-abot sa pamatasan sang mga kapulisan nga antes mangin Patrolman, kinahanglan nga “i-maoy” test ini, bangud makatuga ini sang kahuy-anan sa organisasyon sang PNP.
Ini ang ginpahayag ni Atty. Celis, may kaangtanan sa alegasyon sa duha ka mga pulis sang Dumarao MPS nga sanday PSSgt. Arnel Bucsit kag PSSgt. Antolin Sumatra, nga ginatudlo suspek sa pagtapungol kag pagtampa kay Brgy. kagawad Jonel Punsalan kag kaupod nga si Anthony Bajada, sang Brgy. Sibariwan, sa amu nga banwa.
Dugang pa ni Celis, kun mapamatud-an man sa imbestigasyon nga matuod ang elegasyon batuk sa mga suspek, mas maayo nalang nga mag-resign ang mga ini kag indi na paghulaton nga mag-retired bangud kanugon ang ginagasto sang gobyerno sa mga kaangay nga tawo.
Apang, sa karon nga naga-imbestigar ang katapo sang PIAS-Capiz, hulaton ang imbestigasyon kag hatagan sang kahigayunan ang mga pulis nga maghatag sang ila bahin, kag kun mapamatud-an nga matuod ang elegasyon batuk sa duha ka mga pulis, magapangatubang ang mga ini sang nagakaigo nga kaso.
Nahibaluan nga indi na ini bag-o nga hitabo, sa pagkamatuod suno kay Atty. Celis nga madamo na sila sang nasipa sa serbisyo nga mga kapulisan bangud sa pag-maoy.
