Nagakabalaka ang National Aeronautics and Space Administration (NASA) bangud sa magkasunod nga pagsulod sang mga bagyo sa West Pacific partikular na sa Pilipinas nga ginalaragway sang ahensya bilang ‘unusual sight’.
Suno sa ahensya, nagakahinabo ang Typhoon season sa West Pacific sa bulan sang Mayo kag Oktubre lamang.
Suno naman sa Japan Meteorological Agency ang magkasunod nga pagsulod sang bagyo sa bulan sang Nobyembre sa kadagatan nga pasipiko partikular na sa Pilipinas ang nabalhag bilang ‘first time’ sa kasaysayan sumugod sang 1951 kun sa diin nabalhag man ang asud-asod nga pagsulod sang mga bagyo sa Pacific basin.
Kun matandaan, halos magkasunod lamang nga nagsulod ang mga nag-agi nga bagyo sa landmass sang Pilipinas, kalakip ang bagyong ‘Marce’, nga nag-igo sa pungsod sang Nobyembre 7, makaligad lang ang apat ka adlaw, nagsulod naman ang bagyong ‘Nika’ nga nagpanglaslas sa probinsya sang Aurora.
Sang adlaw sang Huwebes sang nakaligad nga semana sa bulan gihapon sang Nobyembre sang nagsulod kag maglaslas ang linggo ang bagyong ‘Ofel’ kun sa diin linibo nga mga residente ang gin-evacuate sa Northern Luzon.
Samtang, ginbalita naman sang state weather bureau ang pagsulod sang panibag-o nga bagyong ‘Pepito’ nga ginalauman nga manglaslas sa Bicol, Central Luzon kag Metro Manila nga posible pa nga magbaskog bilang super typhoon.
Sa ginhiwat nga assessment report sang United Nation (UN) humanitarian coordinators sa Pilipinas sa nakaligad nga mga binulan, nagdangat na sa 207,000 nga kabalayan ang nahalitan sang mga magkasunod nga bagyo nga nag-agi sa Pilipinas kun sa diin 700,000 nga mga indibidwal ang padayon nga nagapabilin sa mga evacuation center.
