ROXAS CITY – Natigayon nga mademolish ang isa ka puluy-an sa Poblacion Tacas, Cuartero, Capiz subong nga adlaw sang Martes Oktobre 3, 2023.
Sa interview sang Bombo Radyo kay PMaj. Christian P. Mahometano hepe sang Cuarteo Municipal Police Station, ginpahayag sini nga ang nasambit nga duta ang ginapamag-iyahan sang pamilya Arroyo De Eyoy, Natalia Arroyo-Gregorio samtang ginpatindugan sang puluy-an sang pamilya nanday Pedro Himan, Silvestre Himan, Estelita Himan kag bana sini.
Suno kay Mahometano, masobra 23 ka tuig ang pagkinasuhay sang duha ka pamilya angut sa nasambit nga duta.
Sa ginpatigayon nga pagwasak sa puluy-an, yara ang presensya sang katapo sang Cuartero Municipal Police Station, Bureau of Fire Protection (BFP), Capiz Electric Cooperative (Capelco), Provincial Disaster Risk Reduction Management Office (PDRRMO) kag pila ka mga Medical Team agud magresponde pananglitan nga may mga indi maayo nga matabo sa nasambit nga operasyon.
Ginpahayag man sang hepe nga wala na nagpamalabag pa ang pamilya Himan bangud may yara na ini sang Writ of Demolition and Order nga nagikan sa Korte kag matalunsay nga nagbulig na lamang sila sa pagpanguha sang ila mga kagamitan.
Samtang, sa separado naman nga interview sang Bombo Radyo sa pamilya Himan ginpahayag sini nga nagahulat na lamang sila kun anu ang masunod nga desisyon kag kung sa diin sila temporaryo nga magatinir.
Mahibaluan nga 7 sila ang nagapuyo sa amu nga puluy-an.
Ang nasambit nga Writ of Demolition and Order ang gin-isyu ni Hon. Kristine B. Tiangco- Vinculado Presiding Judge sang RTC Branch 16, Roxas City.
