Isa na siguro sa mga pinakakilala nga sud-an sang mga Pilipino amu ang sinigang. May sinigang nga baboy, isda kag hipon. Apang sinigang nga corned beef, posible ayhan?
Trending subong sa social media ang pagluto sang sinigang nga corned beef. Ginapahayag nga nagsugod ang cravings natuhoy diri sadtong tinalikdan nga mga semana, bangud sa post sang isa ka social media personality nga si “Jenela in Japan” nga nagapamangkot kun may nagabaligya sang kasubong nga klase sang putahe sa Baguio bangud indi suno diri magpati ang iya nga boyfriend nga may naga-exist sang kasubong nga sud-an.
Sa video update, ginpahayag ni Jenela nga bangud wala sang makita nga nagabaligya sang sinigang nga corned beef ang iya boyfriend nga si Kevin, siya na lang ang nagluto sini para sa iya.
Sakto naman sa pansabor ni Jenela nga nagabusong ang nasambit nga luto kag cravings satisfied naman ini.
Madamo sang netizens ang nagpahayag nga subong lang man nila nahibaluan nga may kasubong gali nga klase sang sinigang. Ang iban naman, nagasiling nga madugay na nga may amu nga klase sang pamaagi sang pagluto sang sinigang sa probinsya.
Kaangay nga challenge na ang pagluto sang sinigang nga corned beef para sa madamo nga netizens bangud nangin swak na sa nagkalain-lain nga social media platforms ang wala-tuo nga upload sang bersyon nila sang nasambit nga sud-an.
