ROXAS CITY – Indi madula nga makabatyag sang pagkadismaya ang hubon nanday Umajesty Williams, Frederick Ramirez, Joyme Sequita, kag Michael del Prado matapos ang ila paghampang sa men’s 4x400m relay nga ginhiwat sa nagapadayon nga 19th Asian Games sa Hangzhou, China.
Sa interview sang Bombo Radyo kay Joyme Sequita, ginpahayag sini nga segundo na lamang ang kulang agud mangin kwalipikado sila sa 2024 Paris Olympics.
Mahibaluan nga duha lamang ka bulan ang ila paghanas antes ang nasambit nga hampang.
Ini ang ginakalakipan sang 44 tanan ka mga nagkalain-lain nga mga pungsod, kung sa diin nagpakita sang ila tagsa ka mga abilidad kag napauli sang pungsod India ang kadalag-an.
Suno kay Sequita, ini ang labing una nga nagpakigbahin ang ila hubon sa ASIAN Games rason nga indi madula sa ila ang kakulba nga nabatyag.
Matandaan nga sadtong Agusto, naghampang man ang mga ini sa Thailand kag naka-break sang record.
Sa karun, nakapauli na sa Pilipinas ang hubon nanday Sequita kag liwat naman nga nagatraining sa ila palaabuton nga hampang sa bulan sang Disyembre.
