Nag-apelar ang National Bureau of Investigation (NBI) kay Senador Ronald “Bato” dela Rosa nga matawhay nga magsungka sa tunga sang ginpaguwa nga arrest warrant sang International Criminal Court (ICC).
Ini ang sabat ni NBI Director Atty. Melvin Matibag matapos gin-anunsyo ni Dela Rosa nga indi niya pagpamatian ang panawagan sang minority senators nga magsungka.
Ginhatagan pagtamod ni Matibag nga bilang isa ka anay law enforcer, nakahibalo si Dela Rosa sang proseso kag masami niya nga ginalaygayan ang mga subject sang warrant nga magsungka sang husto.
Suno sa NBI Director, katuyuan sini nga panawagan nga malikawan ang anuman nga kinagamo ukon paglagas, kag atubangon ang legal nga responsibilidad.
Ginpanindugan ni Matibag nga naghalin sa “competent court” ang warrant nga dapat tahuron.
Nagpaandam pa ini nga kun indi magsungka ang senador, lauman ang posible nga paglagas bangud ang mandato sang law enforcement amo ang pagpatuman sang kasuguan agud malikawan ang breakdown sa law and order.
Madumduman nga napaslawan ang mga otoridad sa pagserbe sang warrant kay Dela Rosa sang Lunes matapos nga natapos sa paglagas ang mamalidha rason nga ginpaidalom sa protective custody sang Senado ang mamalidha tubtob subong.
