Ginmanduan ni Department of Agriculture (DA) Secretary Francisco Tiu Laurel Jr., ang National Food Authority (NFA) nga magpaguwa sang bugas para sa relief operations sa mga lugar nga ginhalitan sang bagyo.
Suno kay NFA Administrator Larry Lacson, may yara sang 2.4 million ka sako sang bugas nga ginpain para sa disaster response ukon katumbas sang 27 percent sang kabug-usan nga stockpile sang National Food Authority.
Ginpasalig sang opisyal nga bastante na ini agud masabat ang national consumption sa sulod sang siyam ka adlaw.
Sa Bicol Region, ginreport ni Lacson nga ang NFA nagpreposisyon kag nagpaguwa sang 2,117 ka sako sang bugas bilang kabahin sang pre-disaster response para sa mga komunidad nga apektado sang Nando kag Habagat.
Pila man ka mga lokal nga panguluhan sa Albay, Ligao, Daraga, Malilipot, Catanduanes, Baras, kag Pili ang nag-widraw man sang ila mga alokasyon sa mga bodega sang National Food Authority agud suportahan ang mga apektado nga pumuluyo.
Dugang pa niya,nakahanda ang NFA regional operations centers nga magsuporta sa nagapadayon nga relief efforts.
Samtang, suno kay Agriculture Assistant Secretary Genevieve Velicaria-Guevarra, nga nagadumala sa programa sang Presidente nga KADIWA, magapadayon ang Department of Agriculture sa pagbaligya sang bugas sa balor nga P20 kada kilo kaupod ang mga lokal nga gobyerno, ilabi na sa mga apektado nga lugar nga wala pa nakabaton sang ayuda.
