Daku ang mabulig sang pagselebrar sang National Hemophilia Awareness Month sa pag-angkon ihibalo sa sakit nga hemophilia.
Sa interview sang Bombo Radyo kay Dr. Marilyn D. Castro, Pediatric Hematology-Oncology Specialist, iya ginpahayag nga ang hemophilia ang isa ka hereditary ukon genetic nga kondisyon nga nagatuga sang kakulangan sang clotting factors sa dugo nga responsable sa pag-clot sang dugo kon may pilas ukon injury.
Suno kay Castro, may duha ka sahi sang hemophilia, ang type A kag type B kun sa diin mas madamo ang lalaki nga apektado bangod ini ang dala sang X chromosome.
Pahayag pa niya, ang pag-angkon sang ihibalo sang pamilya kag sang pasyente nahanungod sa ila kondisyon, lakip na ang paglikaw sa high-risk nga aktibidad amo ang isa sa pinakaepektibo nga pamaagi agud maproteheran ang kabuhi sang may yara sang hemophilia.
Dugang pa sang natungdan, indi dapat kahadlukan ang sakit nga hemophilia bangod paagi sa insakto nga impormasyon, maaga nga diagnosis, kag nagakaigo nga bulig medikal, posible nga mangin normal kag produktibo ang kabuhi sang isa ka pasyente.
