CAPIZ-Nagbisita kay Capiz Governor Fredenil H. Castro ang mga opisyal sang National Library of the Philippines (NLP) agud talupangdon ang kahimtangan kag operasyon sang mga pampubliko nga library sa probinsya.
Ginpangunahan ni NLP Director Cesar Gilbert Q. Adriano ang delegasyon sa courtesy visit sa Capiz Provincial Capitol sa Roxas City, upod kanday Vida Dorea P. Mendoza, Librarian III, kag Sherlyn Amber V. dela Cruz, Librarian I, nga sakop sang NLP-Public Libraries Division.
Ginpahayag ni Adriano nga kabahin sang ila pagbisita sa Capiz ang pagpatigayon sang mga interview kag pag-obserbar mismo sa mga pasilidad sang mga pampubliko nga library nga kaakibat sang NLP sa nagkalain-lain nga banwa kag komunidad.
Pinaagi sa sini nga pag-usisa, talupangdon ang operasyon sang mga library, kahimtangan sang mga pasilidad, koleksyon sang mga libro, mga kagamitan sa pagtuon, proseso sa administrasyon kag kalidad sang serbisyo nga ginahatag sa publiko.
Ang resulta sang assessment gamiton agud mahibaluan ang mga kinahanglanon sang tagsa ka library kag ang mga bahin nga kinahanglan pa pauswagon agud mas mapauswag ang serbisyo sini sa mga pumuluyo.
Kabahin man sang plano sang NLP ang paghatag sang dugang nga mga kagamitan kag learning resources sa mga library sa mga barangay kag banwa, agud mapalapad ang access sang mga estudyante kag iban pa nga pumuluyo sa mga libro, materyales sa edukasyon kag mga kahigayunan sa pagtuon.
Ginapakita sang inisyatibo ang importansya sang pagbinuligay sang nasyonal kag lokal nga panggobyerno sa pagpalig-on sang pagbasa, padayon nga pagtuon kag patas nga access sa ihibalo para sa mga Capisnon.
