ROXAS CITY – Ginpasidunggan sang National Youth Commission ang SK sang Brgy. Libas bilang Outstanding Sangguniang Kabataan Awards kag Best SK Chairperson for COVID-19 Initiatives, sa ginpatigayon nga 2022 SK National Summit.
Sa interview sang Bombo Radyo kay Hon. Cyprian Jade Basa, SK Chairman sang Brgy. Libas, sini nga syudad, ginpasalamatan sini ang tanan nga mga volunteers kag ila konseho, subong man si Mayor Ronnie Dadivas sa nangin rekomendasyon agud maangkon ang nasambit nga kadungganan.
Ang amu nga pasidungog ang pagkilala sang initiyatibo nga hinimuan sang mga kabataan sa pagpakigbato sa COVID-19 pandemic, kaangay sang pagpanagtag sang hygiene kits sa mga pumuluyo nga ginahimo man sang halos kadam-an nga SK, pagpatigayon sang mga programa nga nakabulig sa mga kabataan sa ila emosyonal nga aspeto, pagbulig sa vaccination drive sang lokal nga gobyerno sang syudad, separado nga libreng sakay sa mga frontliners kag fish vendors sa ila barangay, kag iban pa.
Aminado si Basa nga madamo sang mga pagpanghangkat agud mapatuman ang nasambit nga mga programa ilabi na sadtong kasagsagan sang COVID-19 pandemic, apang bangud sa ila kooperasyon, natigayon kag nagbunga ang ila tinimakasan.
Ginpahayag man sang nasambit nga youth leader, nga wala sang incentives ukon kabaylo nga kuwarta ang amu nga pasidungog kag manami na nga batyagon ang marekognisar ang ila mga hinimuan bilang mga kabataan sa komunidad.
