ROXAS CITY – Nabaton na sang talatapan sang National Bureau of Investigation (NBI)-Capiz District ang ginpadala nga sulat sang Parents-Teachers Association (PTA) President sang Feliciano Yusay Consing National High School sa President Roxas, sa hinyo nga imbestigahan si Dr. Quinto Tagoc, Jr. bangud sa pila ka mga ginaalegar anomaliya nga ginahimo sang School Principal sa amu nga bulothoan.
Sa interview sang Bombo Radyo kay Agent John Katipunan, Deputy Executive Director-NBI Capiz, suno diri, ang duha ka panid nga sulat ang indi sang complaint, kundi nagahinyo sa ila talatapan nga imbestigahan ang nasambit nga school principal.
Bangud sini, ginahinyo sang NBI nga magpadulong sa ila opisina para sa case conference bitbit ang supporting documents ukon pruweba nga magasuporta sa alegasyon sang PTA President.
Sa tion nga makapadulong na ang PTA President sa NBI, pagasundon nila ang due process, kag kun may makita nga probable cause, pagahatagan man sang ahensya ang nasambit nga Principal sang tion nga magsabat.
Ginpahayag man sang ahensya nga indi na ini bag-o sa ila nga senaryo nga ginapaimbestigahan ang government employees.
Sa karon, pagahulaton sang NBI-Capiz ang pagtambong sang nagpadala sang sulat, sa ginapatawag nga case conference sang ahensya.
