Roxas City – Makabig nga isa ka dako nga pagkilala sang National Bureau of Investigation (NBI) Capiz, matapos malakip ang ila talatapan bilang top 8 best performing district office bug-os nga Pilipinas.
Sa interview sang Bombo Radyo kay John Katipunan NBI Capiz Investigation Agent III, ginpahayag sini nga tuman ang ila kasadya kag pagpasalamat matapos madala sa nasambit nga pasidungog ang ila ahensya.
Mahibaluan nga may yara sang 42 tanan ka mga distrito ang NBI sa pungsod.
Suno kay Katipunan mas pagatutukan pa nila nga matapna ang nagkalain-lain nga mga malain nga aktibidad sa probinsya kaparehas sang mga anti-illegal drugs, double your money scam, pagdakop sa mga wanted nga persona kag madamo pa.
Dugang pa sini, dako man nga bulig sa ila talatapan ang pagpalab-ot sang mga publiko kag mga concern citizen sang mga nagapatigayon sang malain nga aktibidad agud matigayon nga madakpan ang yara sa likod kag nagapanikasog sini.
Tinutuyo man sang ila ahensya nga indi lamang top 8 ang ila masarangan kundi todo man ang ila pagtimakas nga makasulod sa top 5.
Mensahe sini sa publiko, mag-upod kag mag-ugyon sa ila mga ginapatuman nga programa agud dalayon na nga mangin malinong kag matawhay ang probinsya.
