Bukas si National Bureau of Investigation (NBI) Director Jaime Santiago sa posibilidad nga i-tap ang International Criminal Police Organization (Interpol) agud lagson ang mga Filipino content creator sa iban nga pungsod nga gin-akusaran sang pagpalapta sang disinformation.
Sa tunga sang padayon nga imbestigasyon sang NBI sa mga vlogger nga gin-akusaran sang pagpalapta sang fake news, ginpasiguro ni Santiago nga mangin isa ka tampad nga proseso ang pagpangayo sang bulig sa Interpol nga i-extradite ang mga naglapas nga Filipino nga vlogger nga naka-base sa luwas sang pungsod.
Ginhimo ni Santiago ang pahayag isa ka adlaw matapos sini nga ibuyagyag nga natumod na kag ginabantayan na sa karon sang NBI ang yara sa 20 ka vlogger nga ginadudahan nga nagapalapta sang sala nga impormasyon.
Ginsambit sang NBI chief ang mga pagpanghangkat sa hurisdiksyon sa pagdakop sang mga indibidwal sa iban nga pungsod nga may nagkalain-lain nga legal frameworks partikular sa Estados Unidos kun sa diin indi criminalized ang libel.
Kaangut sini, suno kay Santiago ginaimbestigaran na sang NBI ang mga alternatibo nga legal approach, kalakip ang mga potensiyal nga kaso sang inciting to sedition kag tax evasion.
Ang pagdamo sang mga ginaimbestigaran nga online content creator sa idalom ni Pangulong Ferdinand Marcos Jr. ang sa tunga sang nagalala nga tensyon sa tunga sang iya nga pamilya kag sang mga Duterte, partikular ni Former President Rodrigo Duterte nga gin-aresto kag yara subong sa kustodiya sang International Criminal Court.
