Ginhangkat ni Melvin Matibag, hepe sang National Bureau of Investigation ukon NBI, ang mga indibidwal nga nagasiling nga may motibo nga pamulitika ang mga natabo nga operasyon kag pagdakop sang otoridad sang nagligad nga mga inadlaw.
Suno kay Matibag, kon nagapati ang mga ini nga wala nagabase sa ebidensya ang ila mga operasyon, mahimo sila magpasaka sang nagakaigo nga kaso batok sa NBI.
Ginpahayag niya nga ang mga personnel sang NBI nagapokus lamang sa mga ebidensya nga ila nakuha sa tagsa ka operasyon kag indi sa pulitika.
Gin-athag man sini nga wala sang impluwensya sang pulitika sa pagpili kung sin-o ang ila arestuhon, kabaliskaran sa ginapalapta nga alegasyon sang pila ka sektor.
Bangud sini, nagpanawagan siya sa publiko nga mangin patas sa pagtratar kag pagdesisyon labi na sa mga agents ukon personnel sang NBI nga nagaobra lamang sang ila obligasyon sang maayo.
Ginpasiguro man ni Director Matibag nga padayon nila nga imbestigaran ang anuman nga ebidensya nga ila makuha kag indi sila magpaapekto sa opinyon sang iban.
