Igapresentar sa impeachment court ni National Bureau of Investigation (NBI) Director Melvin Matibag subong nga adlaw ang resulta sang imbestigasyon sang ahensya angut sa ginaalegar assassin nga ginapahayag ginkontrata ni Vice President Sara Duterte batuk kay President Ferdinand Marcos Jr., First Lady Liza Araneta-Marcos kag former House Speaker Martin Romualdez.
Suno sa legal spokesperson sang prosecution team nga si Atty. Benjamin Tolosa Jr., si Matibag ang magahatag sang bug-os nga detalye sang imbestigasyon bangud wala na ginasakop sang Cybercrime Division ang bahin nga may kaangtanan sa ginaalegar plano nga pagpatay.
Ginpanindugan ni Tolosa nga ginpakita na sang prosekusyon ang gin-alegar nga pag-istoryahanay ni Duterte sa isa ka tawo angut sa pamahog batuk sa Presidente, First Lady kag anay Speaker, base sa mismo nga pahayag sni Duterete sa iya online press conference sang Nobyembre 23, 2024.
Dugang pa ni Tolosa nga wala ginbawi ni Duterte ang iya mga pahayag sa masunod nga pagguwa sa media. Sa baylo, naghatag lamang siya sang mga paathag para sa ila, gani ginalauman sang prosecutor nga athagon ni Matibag ang resulta sang imbestigasyon sa tion nga mag-atubang ini sa impeachment court.
