ROXAS CITY – Posible nga sa masunod na nga semana magapasaka sang panumbungon ang National Bureau of Investigation (NBI)-Region 6 batuk sa CEO sang Double your Money Scheme nga si Patroceño Don Chiyuto kag sa mga uplines sini.
Gin-una lamang sang ahensiya ang kaso nga ginpasaka kay Junelyn Gregorio, ang CEO sang 25 days double your money investment scheme matapos nga nadakpan ini sa entrapment operation sa Iloilo.
Ginakuhaan man sang affidavit ang iban nga mga investors nga luyag magpasaka sang panumbungon batuk kay Gregorio nga yara karon sa kostodiya sang NBI Region 6 sa Iloilo.
Sa pagpakig-angut sang Bombo Radyo kay Atty. Jeremiah Sargado, Assistant Regional Director sang NBI-Region 6, ginpahayag nga kumpleto na ang judicial affidavit sang mga investors nga desidido magpasaka sang panumbungon kay Don Chiyuto kag kinahanglan na lamang ang voucher kag iban nga papeles nga i-attached bilang ebedensiya.
Apang nahibaluan nga may isa sa napulo ka complainant ang nagback out.
Ginatun-an man karon sang ahensiya kun syndicated estafa ukon large scale estafa ang igapasaka kay Chiyuto.
Ginganyat man sang ahensiya ang mga downlines nga ilakip sa pasakaan sang kaso ang mga uplines, bangud sila ang nangin alagyan agud maka-konekta ang mga investors kay Chiyuto.
