ROXAS CITY – Ginbuyagyag ni Senator Risa Hontiveros nga ginkumpirmar sa iya sang National Bureau of Investigation (NBI) nga pareho ang fingerprints nanday suspended Bamban, Tarlac Mayor Alice Guo kag ang Chinese nga si Guo Hua Ping.
Suno kay Hontiveros, ang pagkapareho sang fingerprints nanday Mayor Guo kag Guo Hua Ping ang nagapamatuod nga isa lamang ang nasambit nga mga persona.
Ginkumpirmar man suno diri sa iya sang ahensya nga matuod ang ginasuspetsahan sini sadto pa nga si Mayor Alice ukon si Guo Hua Ping ang isa ka peke nga Pilipino.
Ginpahayag pa ni Hontiveros nga daku ini nga insulto sa mga botante sang Bamban, sa intitusyon sang gobyerno kag sa kada Pilipino.
Nagapati si Hontiveros nga ini na ang pinakamabug-at na ebidensya agud palayason na sa pwesto si Mayor Alice.
Si Guo Hua Ping ang nakabutang sa Special Investors Resident Visa (SIRV) application ni Lin Wenyi, isa man ka Chinese national kag ang ginadudahan nga biological mother ni Mayor Guo.
