May yara na sang ‘leads’ si National Bureau of Investigation (NBI) director Melvin Matibag sa nahamtangan ni Senator Ronald “Bato” dela Rosa, apang nagpamalibad ini nga maghatag sang detalye bangud sa nagapadayon nga imbestigasyon.
Suno kay Matibag, kun may yara sang tawo nga nakahibalo sang lokasyon ni dela Rosa, ini amo si Senator Robinhood Padilla.
Una na nga ginpahayag ni Padilla nga posible nagapanago si Senator Bato sa ginaalegar sini nga kidnapper, rason nga naghalin ini sa Senado sang Mayo 14.
Nagpamalibad si Padilla nga sabton kun ginbuligan gid man bala niya si dela Rosa nga makapalagyo halin sa Senate premises bangud sa nagguwa nga impormasyon nga updanay ang kaduha nga naghalin sa building.
Nagapanawagan si Matibag kay dela Rosa nga atubangon ang legal nga proseso kag manabat sa warrant sang International Criminal Court.
Dugang pa sang NBI Director, ang boluntaryo nga pagsungka ni dela Rosa makabulig sa pagbalik sang kumpyansa sang publiko sa institusyon bangud naapektohan ang panan-awan sang tawo sa Senado matapos ang iskandalo nga natabo sang nagligad nga semana.
Nagapanindugan si Matibag nga nagapabilin nga aktibo ang arrest warrant sang ICC kag obligado ang law enforcement agencies sang pungsod nga i-monitor ang developments kag mag-coordinate sa idalom sang naga-eksister nga commitments sa international tribunal.
