Nadiskubre sang National Bureau of Investigation (NBI) nga yara sa halos 200 ka mga peke nga birth certificates ang gin-isyu sang civil registry sa Sta. Cruz, Davao del Sur, kadam-an para sa mga Chinese national.
Suno kay NBI Region 11 Director Archie Albao, gin-isyu ang nasambit nga mga peke nga dokumento sumugod 2018 tubtob 2019.
Sa karon, nagapadayon suno ang ila imbestigasyon sa mga peke nga birth certificate nga gin-isyu sa mga Chinese national.
Pananglitan may ebidensya, pagapasakaan na sang nagakaigo nga kaso ang mga responsible nga indibidwal.
Suno sa NBI RD, nadiskubre ang peke nga mga dokumento sa pag-iimbestiga nila kag pagpakig-angut sa iban pa nga ahensiya sang gobyerno kasubong sang Philippine Statistics Authority, Bureau of Immigration kag mga lokal nga gobyerno.
Kasubong man, ini ang may kaangtanan sa pagkadakop sa isa ka Chinese national sa talatapan sang DFA sa Davao City sadtong Hulyo 9.
