Ginpamatud-an ni NBI Director Melvin Matibag nga nagpagwa ang National Bureau of Investigation (NBI) sang subpoena batok sa pila ka personalidad may kaangtanan sa imbestigasyon sang nagluntad nga pagpalupok sa Senado kag sa ginreport nga pagpalagyo ni Senador Ronald “Bato” dela Rosa.
Lakip sa mga ginpatawag sang NBI sanday suspended Senate Sergeant-at-Arms Mao Aplasca, Pasay City Chief of Police Joselito De Sesto, deputy chief of staff ni Senador Robin Padilla nga si Jean Robles, kag ang tiyuhin sang senador nga si Virgilio Carino.
Suno kay Matibag, importante nga mausisa ang papel sang mga nasambit nga indibidwal agud mahibaluan kon may kakulangan sa seguridad kag kon may posible nga responsibilidad sa insidente.
Dugang pa sang NBI, ang mga subpoena nagatuyo nga makakuha sang mas klaro nga testimonya kag ebidensya nga makabulig sa pagpreparar sang detalyado nga report natuhoy sa natabo nga kinagamo.
Ang insidente sang pagpalupok sa Senado nagdul-ong sang daku nga kabalaka sa publiko kag nagbukas sang mga pamangkot parte sa kahandaan sang mga security forces sa sulod sang kongreso.
Padayon sa subong ang imbestigasyon sang NBI, kag ginpasiguro ni Matibag nga wala sang may mapalab-ot sa pagpanabat kon mapamatud-an nga may pagpabaya ukon pagkalakip sa insidente.
Ginsiling man sang ahensya nga ang resulta sang ila imbestigasyon ipasa sa Department of Justice para sa nagakaigo nga aksyon batok sa mga makita nga may responsibilidad.
