Hugot nga magapatuman sang security plan ang National Bureau of Investigation ukon NBI agud masiguro nga luwas ang pag-abot ni dismissed Bamban Tarlac Mayor Alice Guo sa Pilipinas matapos ini nga maaresto kaina sang kaagahon sang mga operatiba sang Indonesian government.
Sa ginhiwat nga presscon sa talatapan sang NBI, ginpahayag ni NBI Director Jaime Santiago nga halin sa Ninoy Aquino International Airport (NAIA) magaagi anay si Guo sa Bureau of Immigration (BI) agud iproseso ang tanan nga mga dokumento antes dal-on sa NBI.
Paathag pa ni Director Santiago nga madugay na nila nga ginapreparahan ang mga pagahimuon nga security plan sa pag-abot ni Guo apang indi nila pag-ibuyagyag sa publiko kun ano nga klase nga mga security measures ang ila nga igapatuman agud mahatagan sang proteksyon si Guo.
Dugang pa ni Santiago nga ginpautdan ni Guo ang iya buhok agud matago ang identity sini base man sa pahayag sang Indonesian government agud indi makilala sang mga nagapangita sa iya.
Ginpasiguro naman ni Santiago nga magaagi sa tama nga proseso ang tanan antes dal-on si Guo sa Senado.
