Lauman sa Enero nga magapaguwa na sang rekomendasyon ang National Bureau of Investigation (NBI) kun dapat nga iduso ang kaso batuk kay Vice President Sara Duterte may kaangtanan sa death threat sini kay President Ferdinand Marcos Jr.
Ginpahayag ni NBI Director Jaime Santiago nga tanan nga ebidensiya kag mga testimonya ang pagausisaon kag tun-an sang maayo agud matumod kun bastante para sa pag-file sang reklamo batuk kay VP Duterte.
Dugang pa sini, apisar prayoridad ang ginapatigayon nga imbestigasyon angut diri, nagsanto naman nga Christmas season gani posible nga matapos ang deliberasyon kag final report sang panel of investigators sa pagsulod sang Enero kag posible nga sa una nga semana pa lamang mapasa na ang rekomendasyon sa Department of Justice (DOJ).
Sang Disyembre 11, liwat nga wala nagtambong si Duterte sa hearing sa NBI kag ginpalab-ot lamang sang iya nga abogado ang sulat nga naga-deny sa akusasyon. Wala naman ginkunsiderar sang NBI ang letter bilang counter-affidavit bangud indi ini sworn statement.
Una na nga ginpakamalaut ni VP Duterte ang NBI kag ginpahayag nga indi ini makakuha sang patas nga desisyon, kag dugang pa ang hinyo sini nga dapat man aksyunan sang ahensya ang pamahog sa iya nga kabuhi.
Nakasaad man sa sulat ni Duterte nga ang NBI ang yara sa idalom sang pagdumala ni Justice Secretary Crispin Remulla samtang si Executive Secretary Lucas Bersamin ang nagpaguwa sang pahayag nga gilayon nga imbestigaran kag aksyunan ang nasambit nga isyu, gani ginpili sini nga indi na maghatag sang paathag.
