ROXAS CITY – Nagpasalig ang National Bureau of Investigation (NBI)-Capiz nga ila pagatutukan ang request ni Gov. Esteban Evan Contreras natuhoy sa cyber crime ukon mga manipulative post sa social media nga nagapanamad sa pangalan sang gobernador.
Sa interview sang Bombo Radyo kay Dir. Manuel Fayre, Jr. ginpahayag sini nga nagpadala sang sulat ang gobernador sa ila talatapan agud pa-imbistigahan ang nagalapta nga litrato nga siya ang indi luyag ni BBM nga makaupod sa partido kag ang litrato nga nagapahayag nga siya ang nag-resign na sa pagka-gobernador sang Capiz.
Suno kay Fayre nga paga-umpisahan na nila ang imbistigasyon kag ini ang igapalab-ot na nila sa cybercrime division sa Metro Manila agud ma-retrieve ang mga alegasyon nga ginahaboy batuk kay Contreras.
Dugang pa sini nga may kapasidad ang ila NBI headquaters nga ma-retrieve ang kasubong sini nga mga manipulative post.
Ginsiguro man ni Fayre, nga sa tion nga may mapamatud-an sila sang may kahimuan sini gilayon nila ini nga pasakaan sang nagakaigo nga kaso.
