ROXAS CITY – Posible buwas ukon sa Biyernes nga adlaw magapadulong sa Roxas City ang National Bureau of Investigation (NBI) Region 6 para magpasaka na sang complaint batuk sa CEO sang Double your Money Investment Scheme nga si Patroceño Don Chiyuto.
Sa pagpakig-angut sang Bombo Radyo kay Atty. Jeremiah Sargado, Asst. Regional Director sang NBI-Region 6 nga naglab-ot sa 20 ka complainant ang maga-file sang ila complaint batuk kay Chiyuto agud maangkon ang hustisya matapos nga napaslawan si Chiyuto nga mabalik ang ila investment nga gikan sa hard earned money.
Ginpahayag nga large scale estafa ang igapasaka nga complaint batuk kay Chiyuto sang mga investors.
Samtang wala pa sang may nabaton nga incident report ang Sangguniang Panlalawigan gikan sa Criminal Investigation and Detection Group (CIDG), may kaangtanan sa imbestigasyon sa ginaalegar pagkidnap kay Chiyuto.
Nahibaluan nga ini ang ginahulat sang provincial board agud makahimo sila sang masunod nga tikang para makapangayo sang bulig kay President Rodrigo Duterte.
Sa pihak nga bahin, hugot naman nga ginpanginwala ni Mr. dela Cruz, ang ginatumod ni Janice Bacay nga ginbuligan sini nga makapay-out sa pihak nga nagdeklara sang holiday si Chiyuto nga ginpay-out man sini sa empleyado sang Bombo Radyo.
Ginlab-ot sang Bombo Radyo Roxas si dela Cruz nga hugot nga ginapanginwala ang alegasyon ni Bagay.
Ginklaro ni de la Cruz kun nakapay-out ini sang ginasiling P4.2 million, nakabakal na kuntani siya sang salakyan.
Ginapanindugan pa nga indi sini personal nga kilala si Bacay kag indi siya upline gani wala sang rason para magpa-pay-out ini.
Nagapati si de la Cruz nga ginhimo lamang ini ni Bacay agud ma-divert ang estorya bangud madamo na sa karon nga mga investors nga iya ginpromesahan ang nagahunting kag nagasukot sa iya.
