MANILA, Philippines – Nagsaka sang tatlo ka pilo ang kaso sang suicide sa Metro Manila sa first quarter sang tuig, suno sa National Capital Region Police Office (NCRPO).
Ginsiling sang NCRPO nga nagsaka sa 111 ang kaso halin Enero tubtob Marso, kumpara sa 33 ka kaso sa amo man nga tion sang nagligad nga tuig.
Suno sa kapulisan, kadam-an sang insidente ginhalinan sang emotional distress, problema sa relasyon, pinansyal nga kabudlayan kag personal nga kapierdihan.
Ginpunto man nga posible nga may kontribusyon ang sobra nga exposure sang kabataan sa online gaming platforms pareho sang Roblox, nga may padayon kag indi pirme kontrolado nga interaksyon.
Ginpanawagan sang NCRPO ang pamilya kag komunidad nga mangin mapisan sa pag-obserbar sang pamatasan kag maghatag sang suporta, samtang ginrekomendar man nga mangayo sang bulig sa National Center for Mental Health kun kinahanglan.
