ROXAS CITY – Nagnegatibo ang resulta sa drug test sa 10 ka mga opisyales sang Barangay Milibili, kalakip na ang barangay secretary at treasurer.
Suno kay Kapitan Midelo Ocampo, kasubong nalab-ot sini ang langit sang makita nga negatibo sila tanan nga mga opisyal sa shabu kag marijuana.
Nagpasalamat man ang punong barangay sa mga kaupdanan sa konseho, matapos nagpasugot sa iya suhestyon nga sila na lamang ang magaabaga sang kagastuhanan sa drug test.
Isumite man ni Ocampo ang resulta sa mga ahensiya sang gobyerno kasubong sang DILG, PNP kag Presidente sang Liga ng mga Barangay-Roxas City chapter.
Plano man ni Kapitan Ocampo nga ipaidalum sa drug testing ang mga tanod sa ila nga barangay para masiguro nga wala sila nagagamit sang iligal na droga.
Nahibaluan nga ikaduha na nga barangay ang Barangay Milibili sa Roxas City nga negatibo ang resulta sang ginpatigayon nga drug test sa mga barangay officials.
