PONTEVEDRA CAPIZ – Wala na sang kabuhi ang isa ka negosyante, matapos ginluthang-patay sang duha ka mga wala makilan-an nga suspek sa Barangay Hipona, Pontevedra Capiz.
Sa interview sang Bombo Radyo sa hepe sang Pontevedra Municipal Police Station nga si PMaj.Gregg Anthony Salbang, ginpahayag sini nga ginkilala ang biktima nga si Charlie Beseo, 43-anyos kag residente sang Barangay Solo, sa nasambit nga banwa.
Suno kay Salbang, sang natabo ang insidente nagikan ang biktima sa iya sini nga punong kag papauli na kun tani sa ila puluy-an sakay ang angkar-angkar sang hinali na lamang ini nga ginluthang sang wala makilala nga mga persona.
Mahibaluan nga dead on the spot si Beseo matapos mag-angkon sang patal nga pilas sa ulo tuga sang pagpangluthang gamit ang .45 caliber nga armas luthang.
Bangud sini, gilayon nga gintyekyar sang mga kapulisan ang CCTV footage sa lugar kag didto nakit-an ang duha ka mga persona sakay sang motorsiklo nga nagaduag itom samtang naksuksuk ang mga ini sang helmet kag madasig nga nakapalagyo sa wala matumod nga direksyon matapos makumiter ang krimen.
Kaangut sini, may ginalantaw na nga person of interest ang mga kapulisan kag sa karun padayon ang imbestigasyon sang Pontevedra MPS subong man ang hot pursuit operation batuk sa mga suspek.
