ROXAS CITY – Pilason ang isa ka negosyante, matapos ginluthang sang wala makilan-an nga suspek sa Poblacion Ilaya, Dumarao Capiz subong nga aga.
Ginkilala ang biktima kay alyas “Junjun” 40-anyos kag residente sang Barangay Bung-aw sa nasambit nga banwa.
Sa interview sang Bombo Radyo kay Nanay Bebing tiya sang biktima, ginapahayag nga dako ang ila kakibot sang mahibaluan ang insidente.
Suno sa iya, ginabulubanta takna 7:00 sang aga sang may nagpanaog sa isa ka motorsiklo kag sa pagdumdum nga magakaon lamang ini sa karinderya apang hinali na lamang nga ginluthang ang biktima kag nagpalagyo padulong sa direksyon sang banwa sang Cuartero.
Ginapahayag nga nagikan ang biktima sa buluthuan agud magdul-ong sang iya asawa sa eskwelahan nga isa ka manunudlo.
Nag-angkon sang pilas sa magkatuhay nga parte sang lawas ang biktima tuga sang pagpangluthang kag gilayon nga ginrespondihan sang katapo sang Bureau of Fire Protection (BFP) Dumarao agud dapatan sang pauna nga pagbulong antes ginpadangat sa Senator Gerardo M. Roxas Memorial Hospital, Dao Capiz para sa nagakaigo nga pagbilong.
Sa karun, hugot nga nagapatigayon sang hot pursuit operation ang Dumarao Municipal Police Station agud madakpan kag makilan-an ang suspek kag padayon pa imbestigasyon angut sa insidente.
