ROXAS CITY – Ginpanginwala sang isa ka negosyante sa probinsya sang Capiz nga siya ang promoter sa pagsulod sang KAPA Community Ministry International Inc. ukon Kabus Padatoon sa siyudad sang Roxas kag probinsya sang Capiz.
Suno kay Mr. Mario Ramos nga wala siya sang ideya sa ginpost sa social media sang KAPA Iloilo-Pavia Branch sa pagpanguna sang ila officer in-charge nga si Mr. Isagani Capitle sa diin ginbutang ang iya pangalan kag contact number sa flyers nga ginpost sa facebook page sang amo nga investment scheme sa diin may yara sang patigayunon nga outreach orientation sa Capiz.
Apang, wala ini nagalaum nga madamo sang mga tawo ang magatambong sa nasambit nga oryentasyon sa diin gikan pa ang iban sa nagkalain-lain nga mga kaprobinsyahanan.
Nagpanindugan ini indi siya ang nangin alagyan para sudlon sang kontrobersiyal nga investment scheme nga KAPA ang probinsya para makakuha sang bag-o nga miyembro.
Aminado man ang negosyante nga miyembro naman ini sa nasambit nga investment scheme sa diin nagdonar pa ini sang 5 mil pesos bangud ginalauman sini ang 30 porsyento nga Love Gift nga mabaton.
