CUARTERO CAPIZ – Nagasakit ang buot ni Mr. Raian Francisco sa katapo sang Cuartero Municipal Police Station, matapos nagpaguha sang pahayag si PCPT. Alladen Talaban, hepe sang Cuartero Municipal Police Station nga wala sang kamatuuran nga may nagluntad nga pagpanghold up sa ila banwa.
Sa exclusive interview sang Bombo Radyo kay Francisco, ginpahayag sini nga natabo ang insidente samtang padulong ini sa banwa sang Cuartero agud kuntani magpangumpra sang iya baligya apang pag-abot sa bahin sang Agdahon sa amu nga banwa may yara sang duha ka mga lalaki nga nagpara sa iya.
Sa paglantaw nga kaangay na-aberya ang mga ini wala siya nagduha-duha nga pondohan agud kuntani magbulig apang hinali lamang nga nagpalapit ang isa sa mga ini kag nagdeklarar hold up.
Bangud sa kakulba ginhatag na lamang niya suno diri ang iya sling bag nagaduag itom kung sa diin may sulod nga P45,000.00 nga kwarta.
Suno kay Francisco, kalian para sa iya nga ginapaguha sang mga otoridad nga daw kaangay ginahimo lamang ini niya ang insidente.
Dugang pa sini nga indi buot silingon wala sang witness nga nakakita indi kuntani pagkuhaan sang basehan nga wala siya nagasugid sang matuod bangud suno sa iya tubtob subong nakabatyag sa gihapon siya sag kahadlok kag kakulba sa tion nga magbyahe.
Matandaan nga base sa biktima, wala siya sang pormal nga matudlo nga suspek bangud nakasuksok ang driver sang motorsiklo sang itom nga bonnet, jacket, shorts kag pula nga helmet samtang ang backrider naman sini ang nakasuksok naman sang itom nga jacket, shorts kag helmet.
