ROXAS CITY – Ginbawian na sang kabuhi ang negosyante nga ginluthang subong nga aga sa Poblacion Ilaya, Dumarao Capiz.
Mahibaluan nga ginkilala ang biktima kay Johnny Habulin 46-anyos kag residente sang nasambit nga lugar samtang ang suspek ang may kataason nga 5’7, malip-ot ang buhok, nakasuksok sang facemask kag itom nga jacket kag maong nga pantalo.
Sa impormasyon nga nakuha sang Bombo Radyo sa Dumarao Municipal Police Station, ginapahayag nga nagpanaog ang biktima sa iya salakyan sang hinali ini nga ginpaulanan sang pagluthang sang wala makilan-an nga suspek.
Bangud sini, nag-angkon sang pilas sa magkatuhay nga parte sang lawas ang biktima nga madasig naman ginpadangat sa Senator Gerardo M. Roxas Memorial Hospital, Dao Capiz para kun tani sa nagakaigo nga pagbilong apang gindeklarar ini nga dead on arrival sang doctor.
Sa karun, padayon pa nga gina-ayam sang mga kapulisan ang nasambit nga suspetsado.
