ROXAS CITY – Business as usual sa Parkland, Florida sa pihak sang nagkuntad nga shooting rampage nga kahimuan sang 19-anyos nga anay estudyante sang Marjory Stoneman Douglas High School.
Sa exclusive interview sang Bombo Radyo Roxas kay US correspondent Raffy Fernando, ginpahayag sini nga wala naapektuhan ang daily activities kag mga negosyo sa lugar apang aminado nga may kahadluk nga nabatyagan ang pila ka mga residente labi na ang mga estudyante nga nasaksihan ang pagpangluthang sang suspek nga si Nicolas Cruz.
Daku nga palamangkutanon man sa karon kun paano nakasulod si Cruz bangud hugot nga seguridad ang ginapatuman sa nasambit nga eskwelahan, sa diin may pulis nga nagabantay sa lugar.
Apang sa pihak sini, nagapati man ang kadam-an nga mga residente nga isolated case lamang ang natabo kag wala sila nadulaan sang pagsalig sa mga pulis nga magahatag sa ila sang seguridad.
Matandaan nga naglab-ot sa 17 ang patay sa pagpangluthang sang isa ka expelled student sa Marjory Stoneman Douglas High School.
