Ginkumpirmar sang Bureau of Internal Revenue ukon BIR sa impeachment trial ni Vice President Sara Duterte nga naglab-ot sa P85.34 million ang combined net income nila sang iya bana nga si Atty. Manases Carpio halin 2007 tubtob 2025.
Ini ang halos P13.3 million nga manubo sa P98.66 million nga net worth nga gindeklarar ni Duterte sa iya 2025 Statement of Assets, Liabilities and Net Worth ukon SALN.
Suno kay BIR Chief of Staff Atty. Anne Loraine Garcia-Marquez, ang nasambit nga kantidad ang base sa ila income tax returns matapos mabuhinan ang expenses kag taxes.
Ginkumpirmar man sini nga may ginpagwa na nga Letter of Authority ukon LOA may kaangtanan sa isa sa mag-asawa, apang wala niya ginbuyagyag ang detalye bangud confidential ini.
Ginsambit man sang prosecutor ang gin-alegar undeclared cash kag iban pa nga assets sang mag-asawa.
Base sa financial statements nga ila ginpresentar, naglab-ot sa P21 million ang cash balance sang 2022, P28 million sang 2023, P15 million sang 2024, kag P13 million sang 2025.
