Ginlatag ni Israeli Prime Minister Benjamin Netanyahu ang mga rason sang pag-apruba sa ceasefire deal sa Hezbollah sa Lebanon.
Sa televised address ni Netanyahu, sang gab-i sang Martes (local time) gikan sa Tel Aviv, gin-isa-isa sini nga ginlatag ang 3 ka mga nagapanguna nga rason sang ceasefire nga magabenipisyo sa Israel.
Una amo ang pagpokus sang Israeli forces sa Iranian front, ikaduha, agud pabaskugon ang ila military forces kag equipments nga magahatag sa ila sang advanced weaponry nga magapabaskog sa ila agud makumpleto ang mga ginatuyo sini kag ikatatlo, ang detaching ukon pagbulagay sang front sang gyera gikan sa Hamas nga nag-pressure sa Hezbollah agud atakehon ang Israel. Makabulig man suno ini agud mabalik ang mga bihag.
Ginhayag man ni Netanyahu nga ang iya obligasyon ang mabalik ang 101 nga bihag, buhay man ukon patay kag agud ma-eliminate ang Hamas.
Matandaan nga sining 4:00 am sang Miyerkules (local time) sa Lebanon, nangin epektibo ang ceasefire nga nagatakup sa masobra isa ka tuig nga giyera sa tunga sang Israel kag Hezbollah.
Sa idalom sang mga kondisyon sang ceasefire agreement, ang Israeli forces ang maga-withdraw halin sa Lebanon sa sulod sang 60 ka adlaw samtang ang Hezbollah forces naman, pagatal-usan sang Lebanese army forces sa timog sang pungsod sa sulod man sang pareho nga period.
Samtang, dugang pa ni Netanyahu, nakadepende sa mangin aksiyon sang Hezbollah kun tubtob san-o magadugay ang nasambit nga ceasefire deal. Kun maglapas sa kasunduan ang Hezbollah, ila ini nga pagasabtan.
