ROXAS CITY-Magapibilin ang hugot nga implementasyon sang gobyerno sang siyudad sa pila ka mga pagsulundan kasunod sa pagpaidalum na sa probinsiya sang Capiz sa General Community Quarantine.
Ini ang ginpahayag ni Roxas City Mayor Ronnie Dadivas sa ginpatigayon sini nga press conference.
Ginpahayag sini nga pagalauman sang mga residente ang ‘New Normal’ nga i-gapatuman sang siyudad pinaagi sa pag-amat amat balik sang operasyon sang mga establisyemento sa baylo nga may pagasundon nga minimum health standards.
Suno kay Dadivas nga indi tanan ang pahanugutan nga makaguwa sa ila mga panimalay magluwas gid lamang sa mga quarantine pass holders, mga work pass holders ukon mga naga-trabaho sa mga essential establishments, frontliners, kag mga katapu sang media.
Magabalik naman sa normal ang operasyon sa mga malls kag iban pa nga mga establisyemento sa siyudad apang limitado lamang ang mga empleyado nga magatrabaho kasunod sa pagpatuman sang pila ka mga minimum health standards kag health protocols.
Gindugang pa sang alkalde nga magabalik sa normal ang pagbiyahe sang mga tricycle sa siyudad apang mangin limitado lamang bangud sa igapatuman nga number coding.
Samtang magapabilin ang pagpatuman sang mga checkpoints kag curfew sa bilog nga siyudad sang Roxas.
Naga-apelar naman ang alkalde sa mga residente nga magsuksok sang facemask kag mag-obserbar sang physical distancing.
