ROXAS CITY – Tuman ang pagpasalamat sang bag-o lamang napilian bilang presidente sang Philippine Councilors League (PCL) Capiz Chapter sa mga nagtib-ong kag nagsuporta sa iya nga kandidatura.
Sa interview sang Bombo Radyo kay PCL-Capiz Chapter President Mitchelle John Patricio, ginpahayag sini unang-una, ginapasalamatan niya ang Diyos bangud sa mga bugay nga ginhatag sa iya kag sa iya pamilya.
Subong man, hugot ang pagpasalamat ni Patricio sa mga nagtib-ong sa iya kandidatura para sa amo nga posisyon kalakip na diri si 1st District Congressman Emmanuel ‘Tawi’ Billones, ang Partido-Liberal, si 2nd District Congressman Fredenil Castro kag ang iya mga kaupod sa ila nga linyada.
Apisar nakuha sini ang suporta sang duha ka mga kongresista, aminado si Patricio nga wala siya nagpakampante sa iya kandidatura.
Samtang ginpasalig naman ni Patricio sa iya mga kaupdanan nga mga Sangguniang Bayan (SB) members sa probinsiya nga tumanon ang iya mga ginpasalig sa iya nga plataporma.
Kalakip diri ang ‘continuing education’ para sa mga konsehal kapareho sang masteral kag doctorate program, health benefits, paglibot sa mga kabanwahanan agud makit-an ang ila mga best practices kag gamiton sa iban nga local government units (LGUs), kag ang pag-empower sang Sangguniang Kabataan (SK) pinaagi sa pagsuporta sa ila mga programa.
