ROXAS CITY – Nagpaidalum na sa Mandatory Training, ang mga Newly-Elected SK Officials sang Roxas City.
Sa interview sang Bombo Radyo kay Mr. Gino Salamanca City Local Officer sang Depertment of Interior and Local Government (DILG) Roxas, ginpahayag sini nga ang nasambit nga aktibidad nagsugod na sang tinalikdan nga adlaw.
Suno kay Salamanca, sa una nga batch sang mga Sanguniang Kabataan nga natapos na amu ang Barangay I, Banica, Baybay, Lawaan, Dumolog, Tanza, Olotayan, Inzo, Libas kag Cabugao.
Tinutuyo sini agud matun-an sila kag mahatagan sang instakto nga giya para sa ila mga obligasyon kag responsibilidad nga mangin isa ka maayo nga lider sa ila lugar ilabi na sa mga kabataan.
Mahibaluan nga ang Department of Interior and Local Goverment (DILG), ang nag-organisar sang Mandatory Training sa mga bag-o nga napilian nga Sangguniang Kabataan Officials sa Roxas City.
Ang SK Mandatory Training, naga-unod sang mga modules angut sa Decentralization and Local Governance, SK History and Salient Features, Planning and Budgeting, Minutes and Resolutions, kag Code of Conduct and Ethical Standards.
Ginpahayag man ni Salamanca nga 10 lamang ka mga opisyal ang ginapaidalum sa training kada adlaw kag ini ang magatakop sa Nobyembre 13, 2023.
Ginklaro man sini nga antes magpaidalum sa nasambit nga training kinahanglan nga magabayad sang P2,000.00 bilang registration fee kung sa diin mahimo nga ma-reimburse sa tion nga sila ang magapungko na sa pwesto.
Samtang, sa palaabuton nga Nobyembre 14, patigayunon naman ang SK Federation election kung sa diin magapili sang mga opisyales ang tanan nga mga SK.
Sa pihak nga bahin, ginpahayag man ni Salamanca nga indi lamang ang SK Chairman ang may pagabatunon nga honoraria bangud sumugod subong may yara na nga mabaton ang mga nagdaog nga SK Kagawad gani wala na sang rason suno diri nga indi sila magtambong sa mga session nga ginapatigayon.
